Den Trondhjemske postvegen er eit gamalt namn på vegen som gjekk mellom Bergen og Trondheim, og som tidleg på 1700-talet vart teken i bruk for å frakte post då staten overtok ansvaret for postvesenet. Sidan 2023 har fylkeskommunane i Møre og Romsdal, Trøndelag og Vestland, saman med Statens vegvesen, jobba for å skape meir aktivitet langs den gamle vegen. Prosjektet varer ut 2026.

Les meir om den Trondhjemske postveg

Søk om tilskot

Retningslinjer for tilskotsordning - målretta tiltak langs den Trondhjemske postveg

Tilskotsordninga har ei ramme på kr 200.000 totalt. Maksimalt tildelingsbeløp per søknad er kr 200.000. Tiltaket må gjennomførast på postvegstrekningar i Molde kommune.

Formålet med ordninga

•  Å gjere postveien til eit synleg og levande kulturminne, samanhengande og farbar.
•  Langsiktig vern av postveien.
•  Legge til rette for frivilligheit og formidling og skape trivsel, god helse og kjensle av å høyre saman.
•  Næringsutvikling basert på kulturarv og -miljø.

Kva kan du søke støtte til?

1. Skilting og skjøtsel

Ved skilting ber vi om at skiltmalen som er utvikla for postvegen blir nytta. Skiltmalen byggjer opp under postvegen som varemerke, og gjer han langt meir oversiktleg for dei som skal nytta seg av han. Ta kontakt med kulturavdelinga i Møre og Romsdal fylkeskommune for å få tak i skiltmalen.

Skjøtsel kan variere frå enkelt vedlikehald som består i å fjerne vegetasjon, reinske attgrodde stikkrenner og legge utrast stein tilbake. Dersom det er aktuelt med meir omfattande istandsetting, kor vegen delvis må bli bygd opp att, så bør midlane bli nytta til prosjektering.

Vegen skal ikkje bli gitt ei oppbygning, utsjåande eller funksjon som han ikkje tidlegare har hatt. Det er eit viktig prinsipp at postvegen er eit fysisk kulturminne, og bruken av postvegen skal ikkje øydelegge eller forringe kvaliteten på kulturminnet. Fylkeskommunen vil gi råd og rettleiing om dette i kvart enkelt tilfelle.

2.  Kunnskaps- og formidlingsarbeid

Postvegen kan brukast som kjelde og plattform til kunnskap om både lokal- og noregshistorie. Formidlingstiltak kan skje for eksempel både langs postvegen eller i andre samanhengar.

All kunnskap og innhald som blir skapt med støtte frå tilskotet må vere ope for alle, slik at det får ein positiv effekt for lokalmiljøet.

3.  Verdiskapingstiltak

Det er eit ønske at Postvegen skal vere ein ressurs i samfunnsutviklinga og bidra til verdiskaping. Med verdiskapingstiltak meiner vi tiltak som stimulerer til næringsutvikling og økonomisk verdiskaping basert på kulturarv. Tiltaka skal bidra til at vegen blir tatt vare på, og til nye former for formidling av kulturminne, kulturmiljø og landskap.

4.  Pilotprosjekt eller forprosjekt

Det kan også søkast om støtte til pilotprosjekt eller forprosjekt for å utvikle nye løysingar eller tenester for formidling, distribusjon og sal av opplevingar basert på kulturarv.

Krav til søknaden

Må beskrive tiltak og korleis det oppfyller eit eller fleire av dei tre målsettingane i ordninga.

Framdriftsplan med start- og sluttdato for gjennomføring av tiltaket.

Budsjett og finansieringsplan.

Krav til rapport og rekneskap

Rapport med rekneskap og evaluering skal leverast Molde kommune seinast tre månader etter at tiltaket er gjennomført. Sjå fleire detaljar om rekneskapskrav i eige avsnitt.

Vilkår for tilskotsordninga

Tiltak som har eller kan få anna finansiering i tillegg til denne ordninga blir prioritert, spesielt frivillig arbeid. Lønna arbeid kan leggast inn som eigenandel med faktisk kostnad. Frivillig arbeid kan leggast inn som ein del av finansieringa med ein timesats på 350 kroner.

Tiltak som omfattar kulturminne/kulturmiljø skal ikkje startast opp utan å vere avklart med fylkeskommunen si kulturavdeling. Dette for å sikre at tiltaka blir gjennomført på ein fagleg forsvarleg måte.

For istandsetting og vedlikehald kan tilskotet berre dekke materialkostnader og betalt arbeid til enkle tiltak. Eksempel på dette er tilrettelegging eller istandsetting, klopping, dekking med duk, legging av grus, skilting og liknande. Kostnadar til innkjøp av verktøy og driftsmateriell blir ikkje dekt.

På informasjonstavler skal alltid logo for Møre og Romsdal fylkeskommune vere med. Ved skilting skal de ta omsyn til «Skiltmal for Møre og Romsdal fylkeskommune» og «Skiltmanual 2019». Denne finn du på Merkehandboka (lenke opnast i ny fane).

Søkar må avklare med kommunen om tiltaket krev behandling etter plan- og bygningsloven og anna relevant lovverk.

Det kan ikkje søkast om støtte til tiltak som allereie er iverksett.

Ordninga skal ikkje gå til å betale eigen lønn.

Vilkår for utbetaling

Kommunen kan gjennomføre kontroll for å sjå om at vilkåra for tilskotet etter ordninga er oppfylt. Får søkar spørsmål om det, har søkar plikt til å legge fram alle opplysningar som er nødvendige for at kommunen kan gjennomføre ein slik kontroll. Dette er heimla i bevilgningsreglementet § 10.

Kommunen kan krevje tilskot tilbakebetalt dersom villkåra ikkje er oppfylt. Tildeling av tilskot gjeld det som står i søknaden og vilkåra i tildelingsbrevet. Dersom tiltak i søknaden blir endra utan godkjenning, kan vi trekke tildelinga tilbake. Dersom søkar gir ufullstendig eller feilaktige opplysingar i søknaden, og dette fører til at tilskotet blir utbetalt på feil grunnlag eller for mykje, kan tilskotet heilt eller delvis bli kravd tilbake.

Dersom kommunen utbetaler feil beløp, skal det som er utbetalt for mykje betalast tilbake.

Dersom søkaren ikkje oppfyller vilkår og rapporteringskrav blir tilskotet automatisk trekt tilbake etter 3 år, utan varsel.

Rekneskap

Det er krav om føring og revisjon av rekneskap for tiltaket. For tildelingar under 200 000 kroner skal sluttrekneskapen vere kontrollert og signert av nokon som ikkje har vore delaktig i føringa av rekneskapen.

For tildelingar på 200 000 kroner eller meir er det krav om autorisert revisor. Unntatt frå dette kravet er verksemder som bruker kommunerevisjon eller anna offentleg revisjonsorgan.